街市閑情
2006年1月8日﹔禮拜日﹐天朗氣清﹔個日頭匿埋咗幾日卒之肯露返面﹔十零度到唔算乾…
雖然寒氣逼人但今朝都踩部單車去街市買菜。條街市幾近市中心﹐啲嘢又抵買﹐種類又數不勝數。佢一星期全天候開足六日﹐每日由七點零做到晏晝一點左近。由於做嘢同住得唔近關係少不免平時一星期淨係可以幫襯一兩次。
要明白一個國家、城市文化嘅最好法子就係去逛街市。例如呢條座落Chalet區同Jeanne d’Arc(聖女貞德)廣場之間嘅街市就係個好地方﹗兩排四、五層高磚、石樓襯高大威猛嘅梧桐樹﹐夾住一大一細馬路﹐佢係由一條平衡主街﹐每邊一米零檔位加三米零闊行人細馬路做成嘅。條街市人氣都幾旺㗎﹗啲小販個個「格格都入」﹕人格性格價格樣樣齊。佢哋通常三、兩人夾份開檔嘅﹐但成家大細甚至乎三代同檔嘅又有﹐母子、父子、父女拍檔都有﹐兩公婆夾band都唔少﹗有檔重走親中路線﹐一於請中國留學生咁話﹗成條大街市約莫兩成事頭係北非人﹐佢哋主動﹐識拉客﹐好有禮﹐樂觀。其餘都係地道嘅杜魯茲(Toulouse)人。佢哋一口音樂感嘅法文聽起嚟就靈舍有親切感﹗
其實做小販絕對唔簡單﹕既要顧住盆生意又要禮上往來識交際﹔話就話手唔停得但又唔可以動作生硬﹔把口係就係預咗應酬啲客但又唔可以諸事八卦﹗手腳講就講要靈活但又唔可以打仗咁… 總言之快慢要適中﹐靜中求爽﹐動中帶柔﹗
佢哋天蒙未光起身入貨唔在話﹐重要識斟數、心算甚至做埋孤喱添﹗日曬雨淋、返風落雨、行雷閃電、淋雹落雪﹐全天候、地理式運作 。有時重要擒高擒低、趕頭趕命﹔一句講晒﹕唔寫個服字都唔得﹗
嗡咗咁耐重係兩手空空﹗唔使心急﹐通常一到街市我會行個大運同主角睇個相先﹗
呢檔平就平但係冇咁大隻蛤乸隨街跳嘅﹗依﹐阿大聲公啲生果又幾抵買噃﹗喂乜阿嬸入新貨都無留意添 。三代同檔好耐無幫襯囉噃﹐今次一於上門﹗阿北非老檔個新手佢眉精眼企都幾醒目。四眼金毛姐又買一開二﹕“啲生菜好靚㗎”句話都未收就“兩蚊斤紅椒啱唔啱呀…﹖”“… ?!” 咁突然個客都唔知點答好。但金毛姐唔係監人賴後嗰挺人。
“睇完相”走到篤而家“轉運”行翻轉頭 。一於幫襯三代同檔 。我次次都會“薯”吓佢哋。天時冷用佢煲菜湯又得﹐切細粒加埋鴨油同洋蔥、蒜頭煎都得﹗冬天冇佢點得﹗青沙律照計實係有佢份但天冷頂攏買天香菜(法文endive﹐通常做沙律用)﹐ 環保吖嗎﹗薯完菜完就輪到生果。蘋果、香蕉、桔、荔枝、芒果、李…合唔合時都有。我都係揀咗應時桔。一抽二抽質到個單車袋漲仆仆。
雖然寒氣逼人但絕對值得翻尋味㗎﹗開港有話 一樣米養百樣人﹐咁一條街市養幾樣人…