粵心網誌

2006年1月8日﹔禮拜日﹐天朗氣清﹔個日頭匿埋咗幾日卒之肯露返面﹔十零度到唔算乾…

雖然寒氣逼人但今朝都踩部單車去街市買菜。條街市幾近市中心﹐啲嘢又抵買﹐種類又數不勝數。佢一星期全天候開足六日﹐每日由七點零做到晏晝一點左近。由於做嘢同住得唔近關係少不免平時一星期淨係可以幫襯一兩次。 

要明白一個國家、城市文化嘅最好法子就係去逛街市。例如呢條座落Chalet區同Jeanne d’Arc(聖女貞德)廣場之間嘅街市就係個好地方﹗兩排四、五層高磚、石樓襯高大威猛嘅梧桐樹﹐夾住一大一細馬路﹐佢係由一條平衡主街﹐每邊一米零檔位加三米零闊行人細馬路做成嘅。條街市人氣都幾旺㗎﹗啲小販個個「格格都入」﹕人格性格價格樣樣齊。佢哋通常三、兩人夾份開檔嘅﹐但成家大細甚至乎三代同檔嘅又有﹐母子、父子、父女拍檔都有﹐兩公婆夾band都唔少﹗有檔重走親中路線﹐一於請中國留學生咁話﹗成條大街市約莫兩成事頭係北非人﹐佢哋主動﹐識拉客﹐好有禮﹐樂觀。其餘都係地道嘅杜魯茲(Toulouse)人。佢哋一口音樂感嘅法文聽起嚟就靈舍有親切感﹗ 

其實做小販絕對唔簡單﹕既要顧住盆生意又要禮上往來識交際﹔話就話手唔停得但又唔可以動作生硬﹔把口係就係預咗應酬啲客但又唔可以諸事八卦﹗手腳講就講要靈活但又唔可以打仗咁… 總言之快慢要適中﹐靜中求爽﹐動中帶柔﹗ 

佢哋天蒙未光起身入貨唔在話﹐重要識斟數、心算甚至做埋孤喱添﹗日曬雨淋、返風落雨、行雷閃電、淋雹落雪﹐全天候、地理式運作 。有時重要擒高擒低、趕頭趕命﹔一句講晒﹕唔寫個服字都唔得﹗ 

嗡咗咁耐重係兩手空空﹗唔使心急﹐通常一到街市我會行個大運同主角睇個相先﹗ 

呢檔平就平但係冇咁大隻蛤乸隨街跳嘅﹗依﹐阿大聲公啲生果又幾抵買噃﹗喂乜阿嬸入新貨都無留意添 。三代同檔好耐無幫襯囉噃﹐今次一於上門﹗阿北非老檔個新手佢眉精眼企都幾醒目。四眼金毛姐又買一開二﹕“啲生菜好靚㗎”句話都未收就“兩蚊斤紅椒啱唔啱呀…﹖”“… ?!” 咁突然個客都唔知點答好。但金毛姐唔係監人賴後嗰挺人。 

“睇完相”走到篤而家“轉運”行翻轉頭 。一於幫襯三代同檔 。我次次都會“薯”吓佢哋。天時冷用佢煲菜湯又得﹐切細粒加埋鴨油同洋蔥、蒜頭煎都得﹗冬天冇佢點得﹗青沙律照計實係有佢份但天冷頂攏買天香菜(法文endive﹐通常做沙律用)﹐ 環保吖嗎﹗薯完菜完就輪到生果。蘋果、香蕉、桔、荔枝、芒果、李…合唔合時都有。我都係揀咗應時桔。一抽二抽質到個單車袋漲仆仆。 

雖然寒氣逼人但絕對值得翻尋味㗎﹗開港有話 一樣米養百樣人﹐咁一條街市養幾樣人…

以下係寫畀噏法文嘅人嘅簡介﹐內容有啲唔同但宗旨一樣﹕分享粵語天地樂趣﹗

Passioné de langue et culture françaises, j'en profite pour faire un petit coucou aux français ou francophones qui s'intéressent au cantonais !
Mon but est de promouvoir la langue cantonaise dans tous ses aspects, en particulier la connaissance de la structure linguistique et de la syntaxe spécifiques au cantonais. Sans rentrer dans les détails, vous savez tous très certainement que la langue écrite n'utilise que trop rarement le 'vrai' cantonais - celui que les chinois réservent en général à l'usage oral. En quelques mots simples, la lecture du chinois écrit à la cantonaise ne fait pas que l'on parle cantonais ! Je souhaite rendre au cantonais ses lettres de noblesse en l'utilisant à l'écrit dans ce blog.
Quelles que soient vos questions ou curiosités sur le cantonais, n'hésitez pas ... je me ferai un plaisir d'y répondre.
我鍾意廣東話﹐廣東話鍾意你哋!

你哋好﹗乜咁錯蕩呀﹖入嚟先講喇﹗多謝棒場先﹗

乜話粵語網誌﹖我冇眼花吖嗎﹖冇﹐一啲都冇﹗冇花冇假﹗話又講返轉頭其實你點擊得粵語/廣東話你就一定對粵語有些少好感﹐係咪﹖就等我介紹一吓粵心網誌。

廣東話你就講、聽得多但粵文一定好少人噏、寫過。唔使搵啦﹗直至今日此時此刻重未有好多人用過呢種形式做過呢樣嘢﹗係咪覺得好可惜咧﹖「粵心網誌」以人文為本﹐用一個耳目一新﹐大家既熟悉又親切嘅廣東話成文﹐撇開一切國籍、年齡、身份等偏見同各界、各國籍人士作交流、探討﹐以粵文會友﹐以適當嘅興致、情意、意識去開創一個粵文新天地咁話﹗